As luces apáganse e o pano cae sobre unha das edicións máis vibrantes e apaixonantes da historia do Curtas Festival do Imaxinario. Foron días de intensidade, de salas cheas e dunha enerxía compartida que quedará gravada na memoria de todos os que cruzaron o limiar do fantástico en Vilagarcía.
Hoxe, o sentimento que prevalece é a gratitude. Gratitude infinita cara á gran familia que fai posible que a maxia suceda ano tras ano.
Grazas ao equipo de organización, que se deixou a pel e a alma en cada detalle, traballando incansablemente na sombra para que todo brillase. Grazas aos técnicos de imaxe, son e iluminación, os artífices invisibles que fixeron que cada proxección e cada concerto se sentise e se vise de forma impecable. Grazas ao gabinete de comunicación, por levar a voz do Curtas máis lonxe ca nunca.
Unha mención moi especial para o corazón latente deste festival: o noso voluntariado. O seu sorriso, o seu compromiso e a súa enerxía inesgotable na atención ao público, aos convidados e á loxística foron, sinxelamente, o motor desta edición. Grazas por responder á chamada con tanta xenerosidade.
Agradecemos profundamente o respaldo institucional, vital para que este soño siga medrando: ao Concello de Vilagarcía, á Deputación de Pontevedra e á Xunta de Galicia, por crer na cultura fantástica como motor da nosa comunidade. E, por suposto, aos nosos patrocinadores De Angeles Films, Gadis e Rei Zentolo, e tamén a todos os nosos colaboradores, cuxa aposta polo diferente nos permite seguir soñando en grande.
Pero, sobre todo, grazas ao público. Aos iniciados que encheron cada sesión, que participaron con paixón e que converteron Vilagarcía na capital indiscutible do xénero. Vós sodes a alma do Curtas.
O ciclo péchase, pero non paramos. O equipo xa está soñando e traballando para que o Curtas 2026 sexa unha experiencia aínda mellor, máis grande e máis emocionante. O limiar volverá abrirse o vindeiro ano.
Grazas por ser parte desta marabillosa tolemia.
𝙋𝙝’𝙣𝙜𝙡𝙪𝙞 𝙢𝙜𝙡𝙬’𝙣𝙖𝙛𝙝 𝘾𝙪𝙧𝙩𝙖𝙨 𝙑𝙞𝙡𝙖𝙜𝙖𝙧𝙘í𝙖!
